MHWA SIKPUI RUOI 2009
Posted on | December 7, 2009 | 1 Comment
Mr Sikpui Ruoi Simeon Joute le Miss Sikpui Ruoi Lalruotkim
Mumbai thlierkar, a sun a zan inang rawnga fak le dawn zawngna khawpuiah mipui inko khawma program siem hi thil awl ai lo tak a nih. Hotuhai ha rawtri ngai khawm pawisa lo khawpa chawl lak pap pap dam a trul a. Sinthaw trin, sawl kham hril lova hnam lam dam, lenruol hla dam la hei inchuk nawk tawn tawn dam a trul. Hieng po po bakah, inthuruol tak le sum tam tak seng ngam la hei tul nawk ta pei bawk. A chang chu “ Hui ha!” ti hi awl tak a nih.
A chunga harsatna ei hril hai khi, MHWA thuoituhai le member hai chun hling be tuorin an lo tuor muolsuo hlak a. Tukum khawm, kum dang ang thovin Sikpui Ruoi 2009 ropui takin tarik 21, November khan YMCA Hall, Mumbai Central ah hmang a nih. A hall a changkang a, mo fel tawn tawin bur le ber thler hama a nawt fai ang ela, sailung var thler le fai hai hmanga bawl a ni a. Chu el bakah, air conditioned a la hei ni nawk zui. Mumbai khawmuol lum vut vut lai, thlivir dei ham ham in pungkhawm hai a hei dai vel sal sal chu ei pi le puhai thlantui far thei nghil pal rawi inlau a um rak el. Sienkhawm, changkang na’n ei trobul leh mi thre naw dingzie chu mitin sakhmel le hawiher ah an lang zing.
Hi nia khuol chawng pu chu Dr. L. Fimate a ni a ; Imphal a inthawkin a nuhmei le a nau nunghak naupang tak leh hi program hmang ding ngata hung an nih. Chun, Sikpui Pa chu Rev. Kh. Thangdailo a ni a. Ama khawm, a nuhmei, nauhai, a tupa chena, pakhat tapphel phitbel an hril ang ela hung inphit bel an nih. Chun, mi pui pung khawm lai hin, pa hmelthra tieng, pieng inkhai thli tawk nei, mit la em em el a um a. Ama chu Pastor Lalsiesang a nih. A nuhmei le nauhai ngaituo hman hlek lova, vawisuna sikpui ruoi hi kalvari ruoi leh an mil di’m aw…ti ni awm taka a ngha kuol lap lap zing a nih. Chun, Pu.Franklin L. Khawbung in Surat a a rawihai a hung fen fai tawl bawk.
Program vawngtu Tv. Joseph Songate le Zari Songate ha’n zai takin an sin an hung thaw a. Mike an hei chel a, an hei trawng suok reng rengin an phur zie an suk lang hle. Dar 3 inri vel chun khuol lien Dr L. Fimate a hung tlung a. Inza in entir na’n mitin an ngir seng a. Chu zova chun, chawimawina par khuol lien le sikpui pa kuomah inhlan a nih.
Hun hawng tawngtaina Pastor Lalsiesang Joute in a nei zovin mipui ha’n sikpui hla sakna nei a ni a. Hi hla sak a ni sung hin, mitin in an sira um hai kut chelin an insawi duol duol. Favang thlifim hnuoia thing hna hai hlim taka an insawi ang ela, member hai hlim taka an hei insawi duol duol chu thil mawi a tling a nih. Compere Nk. Zari’n, “Nunghak le tlangval inchelna chance thatak a nih” a ti angin, nunghak le tlangval thenkhat chun an hmang tangkai hle; baua trawng kher kher lo khawma thil tamtak zuk hril nghal el theia zai le style in an inchel tawl.
MHWA chairman, Pu Darzakhum Songate-in welcome speech pekna a nei a. Ama hi a hrila hril chi ni lo, a thawa thaw chi a ni ang hrimin, tuta truma a speech khawm hi a tawi a, an rum bawk. A hril nekin a zieka a sem suok a tam lem. Mi la thaw ngai mang lo, chief guest le sikpui pa hai profile a lo lak khawma, mipui hai lo tiem thei dingin a sem suok a. Chun, member-hai welfare fee le emergency fund ngai pawimaw taka pe dingin uor takin a fiel tawl.
Secreterial report-na Pu Stephan C. Hmar in a nei a. Kum khat sunga MHWA hma lakna hai, a dawt dawtin hrilna a nei a. Typhoid vaccination program a hlawtling zie le an kap po hai typhoid an invawi nawzie a tarlang a. Chun, injection petu nunghak hai khan tlangval threnkhat kawlah a vaccine chau ni lova, hmangaina khawm an kap lut sazie a hril bawk. Inthuruol a kalchawia, thil ropui tak tak hai chang pei dingin mitin uor takin a fiel a nih. Hi zo hin, finance report Tv. John K. Dulian in tawi fel takin MHWA sum ngirhmun report na a nei.
Chief Guest-in thu umzie nei tak tak dei dapin hrilna a nei a. Hmar nauhaiin Mumbai khawpui ah sikpui ruoi huoihawt theia a hang um el hi a lawmzie thu a hril a; thruoitu hai chungah lawmthu a hril nghal. Sikpui ruoi hi Hmar nauhai ta dinga rochan, ei pi le puha’n an lo hmang ve hlak a ni a, chu lei chun humhal le chawisang pei tum a trulzie thu a hril bawk. Chun, ei hnam hi Pathien malsawm hnam a ni a, ei nina identity hi inzapui lova chawisang pei a tulzie dam. Chun ei hnam ei chawisang ding chun ei um dan, ei felna, ei taimakna, bengvarna hai hi Branded Quality a tulzie a hril. Ei tawng inzapui lova, thrangthar hung suok pei hai khawma ei nu tawng hi inbak hlawka ei hmang thei pei a tulzie uor takin a hril bawk.
Sikpui pa hi a hmel en neka upa nisienkhawm, a phurzie hawiherin a kum nekin a suk inlang naupang. Chibai vochuom mitin a buk hnungin, hi program-a pa tak nina inhlana a um hi a lawmzie thu a hril. Mumbai-ah sikpui ruoi vawi li zet hmanga a um el ta hi a ropui a ti hle a nih. A hril dan chun, sikpui ruoi hi mawi le umzie inthuk tak nei a nih a— thil thra inchukna, hlim le lawmna ni, umni in khamna ni, hmang dan thiem rak naw leia buoina suok hlak mei mei a nih a tih. Chun, pi le puha’n malsawmna dawng kum chawva an hmang hlak a nizie le threnkhatin ei sakhuona le hrilhme lo tamtak an umzie thu a hril bawk. Sienkhawm, ei sakhuona le an milzie le hnam khat ni chun nipui nei ve a thatzie le lungruol taka a mawi ding ang taka hmang a thatzie uor takin a hril.
1st Session zo a ni hin thingpui dawnna a um a. Chu zo chun 2nd session hmang nawk nghal a nih. Hi session vawngtu chu Tv. John K. Dulian le Tv. Joseph L. Joute an na; an ni hi tlangval ding chun an phing an bel deu ta khawm a ni thei; nisienkhawm tlan an hrat a, football pet khawm an thiem bawk. Chun, tlangval threnkhat hai angin zai naw hai sien khawm, tiena Abraham ei Pathienin “a ringna chu a felna ah a pawm pek” ang khan, MHWA committee chun “an inpekzona chu an zeina ah” a pawm pek tawp el a nih.
A tran na’n The Super Quartet ha’n hla sakna an hei nei phawt a. An ni hi member laia upa tak hai- Pu.Darthangluoi Sinate(chairman, fellowship), Pu.David Sinate, Pu.Darzakhum Songate le Pastor Lalsiesang Joute- an nih. Anni hi, talent suong um tak tak nei an ni a, anachu vangduoi tlak takin hlasak thiemna talent zawnga an tlaksamzie chu mitin hriet ni mei a ti. Hi lei hi a nih, Home Minister hai chit thaw suol pal an tih ti inlau hmel deu a kil khata an lo inthrung chip nasan. Sienkhawm, an hei sak zet chu leh, beisei nekin an sak thra. Pu David Sinate nuhmei lem chu a kut a ben inring hle ei ringawt nghal a nih. Lo inchuk deu hai sien lem chu, male voice cassette siem dinga mawrna, home minister-haia inthawkin an hmu nghal ring a um. Lo hmu ta reng hai sien, an nuom le nuom lova hla zantin an inchuk a trul ding a na. Thiem bek bek lova an sak kha an sa himna lem ni dingin ring a um hle a nih.
Hi zo hin, mitin I tung, Mr & Ms Sikpui Ruoi 2009 tlangna nei a ni a, a tlangna sin hi MHWA Secy.Pu. Stephan C. Hmar-in a hung nei a nih. SMS vote hmanga tlang suok hai chu, pasalah—Simeon L. Joute, Immanuel Zarzolien, Joseph L. Joute,Sam Lalringsan le Joseph Songate an na; nuhmei-ah—Jenevie Lalruotkim, Elizabeth Khawbung, Irene K. Amo, Rebecca Ngaihte le Bless Rody hai an nih. Rangkachak rawtuina mei a fe tlang rawn po leh a man a tam deu deu ang khan, rawtuina mei nasataka infe tlang tir an nih. Zawna harsa deu deu indawn indawn an ni hnunga tlang suoka um hai chu MR dingin Tv.Simeon L. Joute le MISS dingin Nk.Genevie Lalruotkim an nih. Hi intlangna hin thil chi nga a en an nih. Dr L. Fimate in “An zawna an dawn fuk le fuk naw”;Pu. Franklin L. Khawbung in “An zai dan”; Rev.Kh. Thangdailo in “ Mimal an in present dan”; Pi Thangnei in “Tawng hmang dan indik le lam dan indik” le Pi Lalthazo in “An inchei dan an inhme le hme naw”, a nih.
Hla a min awitu Nk Ruthy Joute,Nk.Dorothy Khawbung,Tv.James Lalkhumsang Nk.Singlienkhawl le rapper Tv. J. Salemthar ha’n an rawl mawi le talent in mipui an suk tlei hle a. Trin hnung khawma an thiemzie mi la hril sup sup a tling phak a nih.
Chun, Sikpui sports-2009 lawmman semna nei a ni a. Lawmman hi medal mawi tak tak le certificate insit um lo deu a nih. Lawmman la(a pakhatna a’nthawka a pathumna chen) pek seng an nih.
Vote of thanks Pu Stephan C. Hmar- hrilna a nei a. Hi zo hin, Sikpui Pa in hunkhar tawngtaina a nei. Mitin el chu Sikpui Ruoi 2010 hmang nawk ngei beiseiin an trin dar tawl tah a nih.
Sikpui Ruoi 2009 pics @ thlalak
Comments
One Response to “MHWA SIKPUI RUOI 2009”
Leave a Reply
Sinlung- Pillai’s Manipur Visit To Push Kuki Militants to Negotiation March 10, 2010
- Hmar.in
- Tax evasion thrives in Ccpur March 11, 2010
- Inpui
- Let's Tickle-1 March 7, 2010
- Hmasawnnathar
- 11 March, 2010Download Hmasawnna Thar Vol-25/132, March 11, 2010 […]
- 11 March, 2010
MH Shoutbox
NameWebsiteMessage
HLA
-
Sponsored Links
December 8th, 2009 @ 9:40 am
Sikpuiruoi chu anhoi hmel khop el. Mr le Miss thlalak hung post thei inla chu lawm um ngot a tih.
(Report comment)