HCF Mumbai
HMAR CHRISTIAN FELLOWSHIP OFFICE BEARER 09-11:
Chairman: Darthangluoi Sinate
Vice Chairman: Lalramthang Amo
Secretary: Lalrothang Tusing
Assistant Secretary: Darzakhum Songate
Finance Secretary: Esther Songate
Treasurer: Dr. Laldaikim Sinate
Information Secretary: James Daihmingthang Pudaite
Musical Secretary: James Lalkhumsang
HMAR CHRISTIAN FELLOWSHIP MUMBAI DANPUI
THUHAWNGNA
Keini, Hmar trawng hmanga, Mumbai khawpui-ah chêngkhawma biekin pakhata inlawi, ‘KHAWVEL VAR IN NIH’ ti thupui hmanga, Hmar Christian Fellowship Mumbai chun hnuoi le vân siemtu Pathien thua kan intrhuoina le inawpna kawnga hmang dingin hi lekhabu hi Dânpui tiin kan ko.
Hi Dânpui hi 16th Nov.2008. a hmang tran dingin kan pawmin, kan inpek.
BUNG I
HRILFIENA
1.Fellowship, Executive Committee, Member le Mipui hai chu hieng ang hin hrilfie a nih:
(i) Fellowship: Hi dânpui sunga Fellowship tia ziek taphawt, a hrilfiena dang, ziek belsa a um si naw chun, Hmar Christian Fellowship Mumbai(HCFM) tina a nih.
(ii) Executive Committee: Hi dânpui sunga Executive Committee tia ziek taphawt, a hrilfiena dang ziek a um ta naw chun HCFM enkawltu dinga mipuiin an thlanghai tina ning atih.
(iii) Member: Hi dânpui sunga member/ mimal tia ziek taphawt, a hrilfiena dang ziek ani naw chun Fellowship a inzieklut chau huom a tih.
(iv) Mipui: Hi dânpui sunga mipui tia ziek taphawt, a hrilfiena hran a um si naw chun Pathien inpâk dinga HCFM biekin a fekhawma Register-a zieklut hai po chau huom a tih.
BUNG II
HMAR CHRISTIAN FELLOWSHIP MUMBAI CHUNGCHANG
2(i) HCFM inkhawmna le lekha ziekna haia Hmar trawng hmang ning a tih. A trul ang dungzuiin trawng dang khawm hmang hlak ning a tih.
(ii) HCFM chu kohran pawl bîk umlo (non- denominational) a nia, kohran le pawlbîk inthlungna le inkuongkeina a nei nawh.
BUNG III
THURING
3. HCFM chun Holy Bible pumpui Genesis- a inthawka Thupuongsuo chen, bu 66 (Thuthlunghlui bu 39 le Thuthlungthar bu 27) hai hi Pathien Thu, Pathien thlarau thienghlim inthuokkhuma ziek ngei ani ti kan ring. Chun inthlungna thuring bultak, inkeihruoina le intrhuoi dân dingin kan pawm.
BUNG IV
MEMBER NI DÂN
4(i)HCFM thuring zawma hi dânpui le inawp dân hai pawma Fellowship a hung inkhawm hlakhai chu member nithei an tih.
(ii) Mumbaia chawl hmanga hung le nauhai kana hung inzin hai chu member a tiem ni naw ni hai.
BUNG V
EXECUTIVE COMMITTEE
5 Executive Committee mawphurna le sinhai chu hieng ang hi ning a tih:
(i) Fellowship enkawla rel trulhai reltu dinga mipuiin an I thlang, Executive committee member um a tih.
(ii) Executive Committee sunga mawphurnahai chu a hnuoia ang khun ning a tih.
(a) Chairman
(b) Vice-chairman
(c) Secretary
(d) Assistant Secretary
(e) Finance Secretary
(f) Treasurer
(g) Musical Secretary
(h) Information Secretary
(iii) Mawphurna le sin siem belsa a trul ani chun a trul ang dungzuiin Executive Committee-in siem belsa thei a tih.
(iv) Executive Committee intrhungna le thurelna ah a zatve neka tlawmlo fekhawma, chu fekhawm hai laia a tamlem thuthlukna chu pawm ning a tih.
(v) Executive Committee member dingin Fellowship member nilai mi pariet neka tlawmlo mipuiin thlang an tih.
(vi) Executive Committee member ding chun mipuiin an I thlang ngei, kum 25 chungtieng mi, Fellowship a inhnikna nei le maloa inkhawm hlak mi ani ding a nih.
(vii) Mipuiin an thlangtlinghai chu anni sunga mawphurna anni le anni insemruol an tih.
(viii) Exective Committee hlui le thar charge inpek sawng dingin Chairman hluiin Joint Meeting ko a tih.
(ix) Executive Committee member dinga mipui thlang nilo, rawngbawlna le intrhuoina sina mi ditum bîk an um chun, Executive Committee chun Committee member dingin mi pali neka tamlo ruot thei a tih.
(x) Executive Committee term chu kum hni sung, January a’nthawka tiemin thla sawmhni pali sung ning a tih. trulna le remchang nawna a lo um pal ani chun inthlang hun hi thlathum sung la keisei/ sawnhlat thei ning a tih.
(xi) (a) Inthlangpui kar laka Executive Committee member nilai mani sin sunzawm thei talo dam anlo um ani chun inbânna lekha ziekin Chairman le Secretary kuoma a pêk ding anih.
(b) Chairman alo inbân nuom ani chun inbânna lekha Secretary kuoma a pêk ding anih. Chuong ang bawkin Secretary khawma an bân nuom alo ni chun an bânna lekha Chairman kuoma a pêk ding a nih.
(c) Inbân member hai chungthu chu Executive Committee-in relin, a tulna ang dungzuiin an inbânna lekha chu pawmin/ hnawl thei a tih.
(d) Inbân memberhai thlaktu ding hin mipuiin an thlang kher ngai taloin Executive Committee chun Fellowship sunga fel le hmangtlaka a ngaitak ruot thei a tih.
BUNG VI
EXECUTIVE COMMITTEE SIN MAWPHUR DÂN HAI
6. Executive Committee mawphurna le sinthaw ding hai a hnuoia ang khu ning a tih:
(i)Fellowship-a thuneina insangtak neitu a nih a. Fellowship sung le department hrang hrang hai buoina relfeltu le thuneina tawp nei a tih.
(ii) Fellowship le Department hai sum hnar siem belsa, sukdanglam le sukbo thuah thuneina tawp nei a tih.
(iii) Department thar siem, a umsa sukdanglam, Department sin siem danglam le sukbo thuah thuneina nei a tih.
(iv) Fellowship inthlangna buotsai le vawng dingin Election Presiding Officer le Election Secretary ding ruot a tih.
(v) Fellowship sunga intrhuoidân le inawpdânhai enin a trul ang dungzui peiin siembelsain/hnawl thei a tih.
(vi) Fellowship in a mamaw dân en peiin a trul hunah Tirko Ordained Upa le Pastor amanih thoktu dang nei dân ding rêlin la thei a tih.
(vii) Fellowship le department tina sumhai kumtawpa enfeltu dingin Auditors ruot a ti
BUNG VII
MIPUI MAWPHURNA
7 (i) Executive Committee-in anrêl amanih, annawleh mi tlawmngai Fellowship thuomhnaw le thilnei hai enkawltu dinga ruot hai chau naw chun mimal hmang dingin Fellowship thuomhnaw hai kol thei ni naw nih.
(ii) Executive Committee in anrêl fel theilo thukhir le pawi tawkthei khawp thu khan a um ani chun mipui vote lain thutlukna siem ning a tih.
BUNG VIII
INTHLANGDAN
8 (i) Election Presiding Officer-in inthlangna chu vawng a ta, ama’n trul a ti ang peiin a trhangpuitu ding ruot a tih.
(ii) Executive Committee inthlangna chu Secret Ballot a thlang ning a tih.
(iii)Executive Committee member thlangnah ‘proposal’ siemthei ni naw nih.
(iv)Executive Committee member dinga thlang, remchanglo Fellowship dân puoa um dâm an lo um ani chun inthlang hmain Presiding Officerin mipui lai indawnna neiin vote pek hmain mipui inhriettir a tih.
(v)Executive Committee Member thlangna-a vote neithei hai chu member, kum 16 le a chungtienga upa, puitlinga inkhawm/sawnlut tahai chau anni ding a nih.
BUNG IX
SUM LE PAI
9(i) Fellowship sumhnár hai chu hieng ang hin trhe a nih:
(a) Sawm-a-pakhat
(b) Pathienni Thawlawm
(c) Ringna Thutiem
(d) Mimal le Pawl a’nthawka thilpek
(e) Executive Committee remtina-a hmun danga hmuhai
(ii) Fellowship chun a hnuoia tarlanghai a khun sum hmang a tih:
(a) Fellowship inrelbawlna-a sengso.
(b) Fellowship mamaw thil(Assets) inchawkna.
c) Hlaw nei dinga Fellowship awptu dinga lâk/chawm (eg Pastor, Tirko, Etc.) hai hlaw.
d) Rawngbawla fesuokna thil
e) Executive Committee remtina-a hmangna danghai.
(iii) Fellowship sum enkawltu le vawngtu dingin Finance Secretary le Tresurer um an tih. Anni hin sum lutna hnar le hmangna hai popo trhataka ziekin kumtawpa Audit thei dingin Account enkawl an tih.
BUNG X
DEPARTMENT INTHUOI DAN
10 (i) Fellowship sunga department hrang hrang hai intrhuoidan ding dânhai a trulna en peiin, Executive Committee-in dân siem a tih.
(ii) Department intrhuoidanhai chu a truol angin hi DÂNPUI siemtrhat dan dungzuiin siemtrhat thei pei ning a tih.
BUNG XI
SER LE SANG
11 (i) Lalpa zanbu sakramen hi hun remchang dan enin Executive Committee in buotsai hlak a tih.
(ii) Fellowship member baptisma changnuom le trul an um chun an chang theina dingin Executive Committee chun remchang buotsai pek a tih.
(iii) Fellowship chanpuola Upa le Pastor Ordination thuah Executive Committee in lampui buotsai pek a tih.
(iv) (a) Fellowship memberin, annawleh member ve ve haiin Fellowship sunga kohran dâna innei an nuom chun, Executive Committee chun Pastor le biekin ngaituo pekin, chu inneina chu buotsai pek a tih.
(b)Fellowship memberin hmundanga kohran dân nuhmei-pasal anei/ an innei
chun chu inneina chu Fellowship-in pawmpui a tih
c)Fellowship member in kohran dân nilova nuhmei/pasal a nei/ an innei chun,
annawle Fellowship member ve ve kohran dân lova an inneia, innei trhat an nuom chun Executive Committee in remruot amanih, vengtieng a an inlawina kohran le inbetuoin hma lâng a tih
(d) Fellowship member kohran danpuoa sietul le kohran dansunga lak lut trul an
um chun an kohran peia inhriettirna la péng a ta. Chun, an kohranhai hung sukfel dungzuiin Executive Committee in hma lang a tih.
BUNG XII
DANPUI CHUNGCHANG
12 (i) Hi dânpui sunga thu hai hi belsa, sukbo, sukdanglam, thlakthleng le siemtrhat hrim hrim a trulna a um chun, Executive Committee chun ngaituoin Committee Member po po zatve neka tam fekhawma, chu fekhawm hai laia a tamlem thuthlukna dungzuiin siemtrhat thei ning a tih.
(ii) Hi dânpui sunga thuhai hrietthiemlo, hrietdan inanglo a um chun, Executive Committee in a umzie hrilfie thei a tih.
Hmar Christian Fellowship Mumbai 1st Anniversary
Secretarial Report
“Hi chen hi LALPAN ami thrangpui a nih” (1 Samuel 7:12)
Ahmasatakin 1st Anniversary hmang thei dinga hun thra mi petu le mi thruoi tlungtu ei LALPA PATHIEN chun ropuina le chawimawina chang raw seh. HCFM Executive Committee(20.02.2009) vawisarina Resoluion No 2 dungzui chun Founding Day hi kumtina hmang hlak nisien tia rel a nih. Chu ding chun ei indinna ni tak kha 28th Thlatrau 2008 ania sienkhawm thra le remchang lema ngaiin a tarik hi a ni thliek lovin Thlatrau Chawlni nuhnungtak (Last Sunday of every March) hin hmang hlak dinga rel le pawm tlang a nih. 1st Anniversary ei hmang hmasatakna a ni leiin Fellowship eini hming chawia Mumbai-a indina a um hi ‘report’ ei tarlang hmain tlawmin a pieng dan hung zepsa met ka tih.
Inhma chun Bollywood khawpui-a hin filmstarhai chau deuthaw khawsa dingin ngaina eilo nei hlak ang khan a uma. Amiruokchu hun hung fe peiin eini rawi, mi ngaia hnamchawm loni hlakhai khawm Mumbai khawpui-a thawkna nei in ei hung um tran zeu zeu ta a. Chuonghai baka chun khawvel khawsakna le fak zawngna inhawi lem zawngin thralhna angin Mumbai panin ei hung tril thla ve trak trak ta a. Kum tam an vawi hma chun ei hung pung ta huk el a. Chu phingleh kawr le vaihai le siemtu inpak tlang el nek chun, trawng le hnam nei eini leiin, ei nu trawng ngei a Pathien inpak dingin inlawi khawm nuomna lungril chu mipuihai lai chun chî angin a hung tro ta a.
Mumbai khawpui-a a vawikhatna dingin kum 2005 Krismas chu mi iemanizat fekhawmin Tv Joseph L Juote a inah thlai in suongin Pu Paukhomoi Singson a inah inkhawmna le lengkhawmna hun hmang a nih. A kumnawk July 29, 2006 hin Stephan C Hmar a inah thlaithleng buotsai meuin mi 30 vel bawr fekhawmin Mumbai Hmar Welfare Association indin a hung ni ta a. Chun MHWA huoihawtna hnuoia 2006 Krismas Kerawl chu thralai pawlin bus ‘hire’ meuin nei ani a, a hlawtling hle. Krismas chu Pu Darthangluoi a in Colaba hmuna hmang a nih. Hi trum hin chu ei hung pung deu ta bawk leiin inhawi taka lengkhawmna hun hmangin Krismas ruoipui chu kiltlang anih. Official taka Fellowship hi indinna iengkhawm ala umnaw leiin biekin dang danga inlawi seng eilo ni lei khan 2007 Krismas ruok chu hmang alo ni ta nawh. Kum hung tharin hun a hung fe peia Lalrothang Tusing chun Fellowship indin ngei a pawimawizie tarlanga mipuihai lai semdar a, an ‘Response’ dapna ding tiin article ‘EI HMASUON MÉK’ ti chu a ziek a. Chuonglai zing chun ala semdar hma chun Jacob Lalmalsawmin MumbarHmar-a ‘Mumbai khawpui-a hin eini hming chawiin Fellowship nei ve ta inla’ tia thurawn a hung thawn chun mipui an inkâk hle el. Ziek sa a lo um tah, la semlo chu ‘edit’ thra nawkin chu SMS chu besanin ‘EI HMASUON MÉK’ chu mipui lai Serial pahni (Feb & Mar) a sem suok a nih. 2008 kum bul anthawk hril langa lo um ta Welfare Outing (Pu Darzakhum Songate Sponsored ) chu 8th March, 2008 (2nd Saturday) hin Kihim Beach ah inhawi ti taka hmang a nih. Hi ni hin tukum chu Good Friday hi hmang tlang seng inla ti rawtna siem a nih. Chuchu suk puitlingin Easter Sunday khawm hmang a hung ni ta pei a. Inkhawm trin hin Easter Egg(Artui But) faktlang ani hnungin hung tlung ding Zirtawp zan khin intina mi pakhat bek Pu Lalramthang Amo ina fekhawma Fellowship indin dan ding ngaituo’ng ei tiu ti rawtna a hung um nawk ta peia. Hi zan hih mi 15 fekhawmin Fellowship indin ngei chu thra an ti tlang angin HCFM chu indin in thla ruk (6 months) sunga lailawk thruoitu ding khawm ruot nghal anih. Hi zana fekhawmhai po chu: Darthangluoi Sinate, Lalramthang Amo, Darzakhum Songate, Stephan C Hmar, Jacob Lalmalsawm, Lalrothang Tusing, Zoliensang Joute, James Pudaite, S K Khojol, K Lalremrauta, Dr. Laldaikim, Esther Songate, Zothansung, Jaya Laxmi le Sangi Amo an nih. Chun lailawk thruoitu dinga thlanghai po chu:
Chairman: Lalramthang Amo
Secretary: Darthangluoi Sinate
Asst Secy: Lalrothang Tusing
Fin Secy: Esther Songate
Tresurer: Dr Laldaikim
Info Secy: James Daihmingthang Pudaite
Musical Secretaries: Zoliensang Joute le K Lalremruata
Nu’n nau inrim takin a paia nau hase rinum em em a tur muolsuo hnunga nau hmel lawmumtak a hei hmu a hlim em em ang el chun HCFM hin Mumbai khawpui suoksan talo dingin khawvel eng a hung hmu hin Mumbai Hmar mipui chu an hlim ta bek bek el a nih. Hi meeting a hin HCFM inkhawmn hmasatakna ding Pu. Darzakhum Songate in tia rel ang dugzui chun 6th April 2008 hin tran alo ni tah. Hi inkhawmna hi Upa Paulienmang in Sam 127:1, 33:12-13 tiemin, Fellowship Pathien kuoma inhlana a nei hma’n inkhawm dinga fekhawmhai po povin Pathien le Upa Paulienmang hma bula thukham hi a hnuoia ang hin insam a nih.
“Kei khawm hi HCFM hawnga lo um ta hi tâ(neitu) taka neia, sukpuitlingtu nidingin le tluong taka fe a, Pathien thlarau thruoina Fellowship ditum tak ani thei ngeina dingin taksa le a trul ang anga thrangpui dingin, Pathien ringsanin kan tiem”.
Harsatak le inrieng taka fe trawk trawkin Pathienni kardan peia in dang danga inkhawmna nei hlak a nih. Pu Darzakhum Songate hai nupa inpekzona leiin biekin hluohaw ding thra takel an hung biek thluk thei leiin Pathien kuomah le an nupa chunga lawmthu um raw seh.
Tarik 17th August,2008 hin biekin a inkhawmna chu tran nghal a nih. Hi biekin hi Fellowship inhlan truma thukhawm intiem ang bawk khan inkhawmna nei hmasatak ani trumin, inkhawm hmain thukham 5 amikipin hrila inhlan a nih. (Self Oath Taking)
- Hi in hi Pa le Naupa le Thlarau inthieng biekna le pawlna in ni dingin kan inhlan.
- Ei Lalpa Isu Krista sandamna hrilna in ni dingin kan inhlan.
- Ringtuhai Lalpa thua insuk thlamuongna le insuk hratna in ni dingin kan inhlan.
- Thlarau inhmanghai kuoma sandamna chanchinthra puongna in ni dingin kan inhlan.
- Felna le hmangaina sukpungna le sukdetna le suklienna in ni dingin kan inhlan.
Hi chena inthawk hin Pathienni zat vawisunni chen hin Lalpa hratna ringin tluong taka inkhawm pei ala nih.
SECETARIAL REPORT: HCFM indin ani anthawka vawisunni chena inthruoi le inhmang danhai chu hieng ang hi anih.
HCFM indin ani anthawk hin Executive Committte vawiriet inthrung tlang a ni tah. Hi inthrung tlang ani zat hin thu khirkhan tak tak le ei trul le pawimawhai le hmatienga fepei dan dinghai ngaituo le hriltlang a ni hlak.
- HCFM Executive Committtee meeting hmasatak, dated 30th March,2008, Resolution No 3 ang dungzuiin Naupang Sande Sikul indin a nih.
- HCFM in awp dan ding le invawng dan ding ti’n EC chun danpui siem rem a tia, chu dungzui chun EC hma lakna hnuoia hin danpui buotsai a nih. Hi danpui hi 11th Nov.,2008 khan mipui a nuom taphawthai inchawka tiemthei dingin tlangzar a nih.
- Danpui-a kumhni dan peia inthlangpui nei hlak ding tia ziek chu kum 2009 January thla khan inthlangpui vawikhatna dingin 2009-11 sunga thruoitu dinghai mipui thlangna nei a nih.
- HCFM chun Baptisma inchang nuom le nau inhlan nuom an um ani chun chuonghai tadingin lampui ruotin, Pastor a kovin a ruoi hlak. Tu chen hin HCFM hmalakna hnuoia Baptisma chang pahni (Elsie Malsawmkim le Abigael Varthamawi ) le nau inhlan pakhat (Abigael Varthamawi) an um tah. Hienghai hi HCFM chun Certificate an hlan nghal bawk. Chuongang bawk chun remchang inchawin Lalpa Zanbu (Sacramen)semna khawm vawikhat nei ani tah. Chun HCFM indin ani anthawka member Pathien dan thienghlima kawppui nei mi pathum an um tah. Chuonghai chu Nuhmei nei 1(Tv Kaprosang Joute) le Pasal nei 2 (Nk Annie Zohmingsang le Nk Lalengzami Zote) an nih. Anni hai khawm hi HCFM chun lawmpuina le chawimawina certificate an hlan bawk.
- HCFM indin ani anthawkin Krismas vawikhat hmang a ni ta bawk. A hlawtling hlea hmatieng pei chu Pathienin rem hung ruotin mani ta ngei biekin la nei naw inla khawm hall inhawi taka ei hmang ngei beisei anih.
- Fellowship enkaitu ding le kohran memberhai awptu dingin Tirko/Pastor enkai mek a nih. Mi tuelkhawma pawimaw-a ngaiin ei trawngtraina-a hai hrezing ei tiu a Pathien trimi,mifeltak ei hmu ngei theina dingin.
- Tarik 18-01-2009 nia Pu Darzakhum Songate ina HCFM Executive Comittee vawirukna Resolution No. 3 dungzuiin kum 2009 anthawk chu puitling Sande Sikul tran dinga rel anih. Chu dungzui chun inchuktirtu ding inruot chawpin Sande Sikul tran alo ni tah. Hmar Christian Leaders’ Forum keihruoina hnuoia hmuntina Hmar kohran po povin Sabzek pakhat inchuk tlang ding tia, kum 2009 sunga ding Levitecus bu chu HCFM khawmin ruol zawm takin alo inchuk ve anih.
HCFM sum hmuna le hmangna- Fellowship hin thawlawm ti bâk chu sumhnar iengkhaw a nei nawh. Hi thawlawm- Pathienni thawlawm le Sawmapakhathai ei phal ang ang le ei ngai pawimaw ang peia ei hung chawikhawmhai hi Pathien ram sukmawitu le sukzautu umsun a nih. Pathien mi hmangaina ei lungrila ei hriet hi a tak ngeia suklangna chu ama ta dinga thilpek ei inhlanhai hi ani ti hre thar nawkin pe uor nawk zuol sau sau ei tiu. Hieng sum le pai hmu a um hi Fellowship trulnahai hrukbitna dinga hmang tlangpui anih. Thuhriltu/Pastor,etc haiin an mi hung kan chang lawmman pek ani hlak. Chu el baka eini’n ei trulna lei lieu lieua Pastor,etc ei ko chang hall haw man le lawmman a awmtawk ang peiin ei pek hlak bawk. Hienghai baka hin tu truma unau Punehai Camp buotsai a khan member a nuom taphawt fe ding ti ani angin a fehai kha kalman le fakmanhai tumpek an nih.
HCFM hming chawi thil neihai- Fellowship a I trul nia ei hriet hai chu ei thei ang anga inchawk pei anih. Tuchena Fellowship hminga ei thilneihai-
- Microphone with stand 2
- Speaker 2
- Mixture 1
- Independent Hlabu 20
- Kristien Hlabu 20
- Thralai Hlatharbu 16
- Curtain 1
- Hollow Guitar 1
- Official Seal- Round Seal, Chairman Seal, Secretary Seal, Treasurer Seal le Fin. Secretary Seal an nih.
Kum 2009-11 sunga Hmar Christian Fellowship thruoituhai
1. Chairman: Darthangluoi Sinate
2. Vice Chairman: Lalramthang Amo
3. Secretary: Lalrothang Tusing
4. Asst Secy: Darzakhum Songate
5. Fin Secretary: Esther Songate
6. Treasurer: Dr Laldaikim
7. Info. Secy: James Daihmingthang
8. Musical Secy: James Lalkhumsang
Committee Members:
Jim D Gangte
Paukhomoi Singson
Marc Lalrohlan
Hmar Christian Fellowship Mumbai hi Pathien malsawmna dit umtak chun thruoi pei raw seh.
Ka lawm ie, Lalpa’n ropuina chang raw seh.
29th March, 2009
Lalrothang Tusing
(Secretary HCFM)
Comments
Sinlung- Mizoram Click as a Team, Finally July 30, 2010
- Hmar.in
- UKRA states its stand point July 29, 2010
- Inpui
- Assam Rifles men trash villagers in Assam July 30, 2010
- Hmasawnnathar
- 30 July, 2010Download Hmasawnna Thar Vol-25/246. July 30, 2010 […]
- 30 July, 2010
MH Shoutbox
NameWebsiteMessage
HLA
-
Sponsored Links
